Gröten to den Plattdüütsch-Singdag                                       

Leve Lüüd van wied un sied, leve Plattsingers,

„Wo man singt, daar sett di driest man daal…...“ Mit disse wöör van J. G. Seume much ik jo all van Harten to den Plattdüütsch-Singdag na Wiefelstäe inladen. Maakt jo een paar vergnöögde Stunnen, denn Singen maakt de Harten wied, Singen verdrifft Kummer un Sörgen, Pien un Stress.

2014 hett de Chormusik in Düütschland en grode Anerkennen beleevt, se is in de bunneswiete List van dat immaterielle Kulturarve upnahmen wurrn. De Chöre un Gesangsverene sorgt daarför, dat dat Singen as Urform van künstlerischen Utdruck all Minschen in Stadt un Land mögelk maakt warrd. Se dräägt darto bi, dat use Kulturarve un ok de plattdüütsche Spraak erhollen blievt, dat de Integration van junge un ole, van hiesige un fremde Lüüd in ene moderne un weltapen Sellschup vörandreven warrd.

Daarüm is de „de Spieker“, de Heimatbund för nedderdüütsche Kultur e. V. heel dankbaar, dat de Männergesangvereen „Frohsinn“ Bokel e. V. na 2012 nu ok 2017 weller in de Hannen nahmen hett, enen Plattdüütsch-Singdag up de Benen to stellen. Wi seggt Danke an all Sponsoren un de Lüüd, de Stütt un Stöön geven hebbt, dat disse Veranstalten up`t best lopen warrd.

Ditmaal gifft dat een Namiddags- un en Avendprogramm. Freut jo up beste Chormusik an`n Namiddag, up en groodardiget Programm, dat so riek un ümschichtig un up kienen Fall langwielig is. Daar gifft dat Olet neven Neiet, vördragen maal swungvull un ok maal sinnig, maal luut un ok maal sachten, sogaar ok meckert, un dat all up Platt.

Un avends gifft dat Köppelsingen. Elkeen Besöker schall mitsingen, so good as he kann. Keen Bang: de Texten staht best praat un de Spaaß steiht bavenan. Dieter Buschmann as Moderator bringt den rechten Schwung in de Saak. Een Beleevnis, wat en so gau seker nich vergeten warrd.

Up vele vergnöögde Gäst freut ik mi nu all

Rita Kropp, Spiekerbaas

Zur aufrufenden Seite zurück